D Alp Hinderfäld liit im wildromantischä Meiätal uf ärä Heechi vu 1664 Meter uber Meer. Si isch mit em Äüto ab dr Suschtäschtraass oder z Füäss uf em altä Säümerwäg erräichbar.

D Alp, wo sich uber fiif Kilometer üsdehnt, isch gnossäschaftlich organisiärt. Im Momänt bsitzet 15 Püürä ds Rächt, ihres Vee uf d Wäid chennä z triibä. Dr Alpvorschtand wählt jewiils ds agschtelltä Personal, wo fir ds Vee und d Milchprodukti züäschtändig isch. Während drii Monetä im Summer wärdet rund 100 Chiä und 50 Rinder gsemmeret.

I dr modern igrichtetä Chääserii wärdet üs dr Milch verschitnigi Produkti gmacht. Üs em greeschtä Täil wird Chääs produziärt, züäsätzlich wird äü nu Jogurt, Ankä und Ziger uf dr Alp Hinderfäld härgschtellt.